Katresnan Tukang Becak lan Pengamen
" Jeng...! , wengi iki wis pitung dina olehmu wangsul
madhep marang Gusti. Sepurane ya Jeng , aku ora isa nganake tahlilan kaya adat
wong liya-liyane yen kesripahan. Ora merga aku ora percaya utawa nyalahi adat
wong Jawa Jeng. Dongaku kanggo sliramu ora tau leren, aku mung isa tahlil
dewean Jeng. Amarga pirang-pirang ndino aku ora narik becak sak wise nguburke sliramu. Rasa kelangan lan
ganjelan ning atiku durung isa ilang. Pasuryanmu ngintil ning mripatku. Piye
aku arep narik becak nek koyo ngono kuwi. Sepurane Jeng..!, aku ora duwe
celengan babar pisan kanggo nganake berkat tahlilan ngundang tangga teparo
". Guneme Parmin dewean ning jero
kamar sing uga dadi ruang tamune, sak wise rampung donga lan tahlil dewe kanggo
Nini Sekar Arum, bojo sirine kang tinggal donya seminggu kepungkur.
Kanggo Parmin, Nini Sekar Arum kaya lintang gemebyar tah
utawa artis kang paling top, sanajan Nini Sekar Arum mung Pengamen tua. Sing
mangkal ning ngarep Warung Dahar ning platarane Pasar Kliwon rikolo wengi.
Meh telung tahun Parmin lan Nini Sekar Arum urip bareng
sakwise disahke Pak Modin sing diarani kawin siri " ben ora dhosa"
jare Parmin . Sanajan mung iso nyewo kamar bedheng kayu sekotak ning jedak
jembatan Tanggulangin, Parmin lan Nini
sing wis ora enom meneh kuwi urip kanthi seneng lan tentrem. Parmin, tukang
becak sing uripe pas-pasan malah kadang kekurangan, amargo golek penumpang
samsaya angel, sawang wae ben omah wis duwe motor lan mobil , wis arang-arang
wong sing gelem numpak becak. Jare marake macet lan kesuwen, ora cocok kanggo
kahanan saiki.
Telung tahun kepungkur rikala Parmin mangkal ning Pasar
Kliwon, ketemu karo Nini Sekar Arum kang lagi ngamen. Nini sing lagi sewulan
nglembara ning kota Kudus isih binggung arep manggon ning endi, amargo yen turu
ning emperan toko ragane wis ora kuat maneh mergo umure wis luwih saka suwidak
tahun. Wis dadi tekade Nini kepingin nglembaroa saperlu melu nguri-uri
kabudayan. Sanajan namun nembang Jawa keahliane, Nini mider dadi pengamen saka
kutha pintah kutha liyane. Nganti lali anak puthune sing ketinggalan ning tanah
sebrang rikala melu program Transmigrasi jaman semana. Sanajan wis tua Nini
isih tetep njaga penampilan, klambine dijaga ben tetep resik tur pantes, wedak
pupur lan gincu mesti ora lali yen arep budal ngamen. Makane kuwi Parmin
nganggep Nini kuwi bintang, artis sing kemoncor ning jero atine.
Kebeneran Nini ketemu Parmin sing kesemsem kenes swarane
Nini sing merdu mendayu-dayu. Wong loro sepakat urip bareng lan nampa apa anane
kahanan, amarga Parmin uga wis duwe anak bojo sing ditinggal ning ndeso. Parmin
kepekso mlebu kutha dadi tukang becak merga pirang-pirang musim panen gagal
terus. Parine ora isa dicagerke maleh kanggo urip sabendinane.
*****
" Kusumaning ati, Duh wong bagus Kang tak anti-anti.....Mung tekamu biso gawe
tentreme atiku....Biyen nate janji tak ugemi ora bakal lali, Tur kelingan
jroning ati sak bedahe bumi...." kaya ngono tembang sing bola-bali
dirungoke Parmin Kang kanthi kewes ditembangke Nini Sekar Wangi. Dhadeke atine
Parmin koyo-koyoo diterak-terak nancep sak jeroning ati apa sing diucapke Nini
koyo kanggo dewekne. Mergo saka iku Parmin wanekake tepangan karo Nini.
" Suaromu kewes tenan cah ayu....oleh aku tepung
sliramu ?" Tembunge Parmin nyedaki Nini kang lagi lungguh ning dingklik
emperan toko.
" Maturnuwun Kangmas....wis nyenengi tembang-tembangku,
Lah slirane yo uga bagus kok..." gunem Nini kang ndadheake atine Parmin
sangsoyo ngambra-ngambra olehe bangun tresno marang Nini, sanajan wis umur Nini
isih katon ayu, kewes lan uga njaga penganggone.
Rikala Parmin meh lunga amarga ana penumpang sing njaluk
diterke nganggo becake , Nini Sekar gumen.
" Kangmas....mengko bengi jam sepuluh aku pethuk ya....."
" Iya Nimas..... bar ngeterke penumpang iki aku
langsung balik mrene meneh . Aja kwatir Nimas ayu !" jawab Parmin kanthi
ati kang ngombro-ombro bungahe.
Mula saka kuwi Parmin ben wayah bubar maghrib mesti ngerke
Nini lunga ngamen ning pasar Kliwon, lan uga methuk yen wis wayah bali.
Katresnan jumbuh ning jero atine wong loro kuwi, apa wae
alangan wis ora isa ngadhang-ngadhangi katresnane, umur lan kahanan ora
dianggep alangan.
Sak wise kawin siri, Parmin lan Nini Sekar ngontrak ning
omah bedhengan cedak kretek Tanggulangin. Nini Sekar mung ngamen yen wayah
bengi wae, nek Parmin tetep narik becak koyo adate. Sak wulan pisan Parmin bali
ning ndeso niliki anak bojone sing ditinggal, ora ana masalah apa-apa karo
keluargane.
Nini Sekar Arum kang umure wis luwih suwidak tahun soyo
ringkih lan lara-laranen, Parmin sing ngopeni lan ngeyem-ngeyemi atine. Sanajan
lara-laranen Nini tetep ngamen ben bubar maghrib nganti jam sepuluh bengi.
Kaya bengi kuwi, Nini sambat yen dadhane sesek awake lemes,
Parmin nyegah Nini ora usah lunga ngamen tapi, kaya ngene jawabane Nini : " Ben wae Kangmas, aku pingin mati pas
lagi nembang ben wong-wong tansah kelingan aku "
Ya ora Nini nyaluk diterke ning Pasar Kliwon panggonan
sabendinane ngamen. Parmin tansah nunggoni bojone ngamen, mergo was-was yen ana
apa-apa karo Nini. Nini katon sumringgah lan swarane tetep merdu nembang
Lingsir Wengi :
" Lingsir wengi....sepi durung bisa nendra......
mring wewayah kang ngreridu ati.
Kawitane mung sembrana, Njur kulina ra ngira
yen Bakal numbuhke trisna....."
Ora rampung tembang kuwi Nini mandek karo nyekeli dadhane,
Parmin langsung mlayu nyedaki Nini lan nyupuk okulele sing isih ning dekepane
Nini, banyur nuntun Nini munggah becak ngajak bali.
Sak wengi deng Nini ora iso turu dadhane dicekeli terus,
namung ora sambat apa-apa, Nini babar pisan ora mangan lan ngombe sanajan Pamin
wis meksa-meksa. Parmin binggung karepe dewe, ora ngerti apa sing arep
dilakoni, isone mung turon karo ngekep
Nini ngelus-elus dadhane Nini.
Adzan Subuh wis gumleger swarane, Parmin pamit lunga ning
mesjid jedak omah sedelok ben isa sholat berjamaah. Nini mantuk lan mesem
rikala Parmin pamit sedelok.
Mulih saka mesjid, Parmin kaged Nini Sekar isa dekekep
okulele sing disingkerke ning cedak amben panggonan Nini turu. Bareng didhelok
ambegane Nini wis ora kathon maneh, didumuk nadi tangane wis ora ana kedhute.
Parmin setengah jerit...
" Innalilaihi......Nini kenapa aku mbok limpe..."
Parmin nangis gero-gero nganti tangga teparone krungu lan
marani.
Kanthi biaya gotong-royong Nini dikubur ning pekuburan cedak
kono. Tanpa upacara mung ditindhake apa sing penting wae carane ngurus mayit.
Sejak kuwi Parmin kaya-kaya'a krungon-krungonen suarane Nini
nembang karo metik okulelene :
" Kusumanging ati...
Duh wong bagus kang tak anti-anti
Mung tekamu bisa gawe tentreme atiku..."
Kudus, 29 Juli 2017
Salam Fiksi
Dinda Pertiwi
Komentar
Posting Komentar